[27] Satis mihi multa verba fecisse videor, qua re esset hoc
bellum genere ipso necessarium, magnitudine periculosum. Restat ut
de
imperatore ad id bellum delingendo ac tantis rebus praeficiendo
dicendum
esse videatur.
Utinam, Quirites, virorum fortium atque innocentium copiam tantam
haberetis, ut haec vobis deliberatio difficilis esset, quemnam
potissimum tantis rebus ac tanto bello praeficiendum putaretis!
Nunc
vero -- cum sit unus Cn. Pompeius, qui non modo eorum hominum qui
nunc
sunt gloriam, sed etiam antiquitatis memoriam virtute superarit --
quae
res est quae cuiusquam animum in hac causa dubium facere possit?
[28] Ego enim sic existimo, in summo imperatore quattuor has res inesse
oportere, -- scientiam rei militaris, virtutem, auctoritatem,
felicitatem.